Ang Husto ray Amo

Ni Angelito G. Nambatac, Jr.

Nahagit ang administrasyon sa atong College Executive Council (CASS-EC) nga giulohan sa Gobernador nga si Mr. Joanim Dipatuan, ang maong alegasyon sa duha ka Facebook posers nga gapagawas og mga litrato sa statement of account sa EC. Dinhi makita nga gikan sa P213,529.33 niubos atong badyet sa P34,349.76 (sumala sa snapshot).

Gusto nga ipaabot aning mga posers nga ang mga tawo diha sa EC kay puros mga kawatan ug gapahimulos sa ilang posisyon, ug imbis mualagad sa ilang isig ka-estudyante mangurakot na man hinuon. Pero gibakakan kini ni Dipatuan. Niingon siya nga dili man tungod gipangkawat na nila ang kwarta sa mga estudyante sa CASS maong nigamay ug kalit ang badyet, pero tungod, niingon siya mismo nga iyang personal nga gihulman ang kwarta nga mukabat sa P70,000 para pang-bayad sa medikal nga kinahanglanon ug galastuhanan sa ilang pamilya. Tungod sa rason nga iyang mama ga-50-50 na. Dili mabalaka, ana siya, nga nauli naman niya ang kwarta sa account sa EC ug kini gipamatud-an sa iyang Bise Gobernador nga si Keshia Redoble.

Ang gibuhat sa atong Gobernador, sa panggamhanan sa mga estudyante, ug ang pagpasagad sa ubang mga opisyales nga giluklok nato dira sa EC para mabuhat ni niya kay usa ka dakong hulga sa integridad sa CASS-EC. Dakong hulga sa salig nga atong gihatag kanila. Ing-ani na diay kasayon nga huslan lang ni bisag kinsa ang kuwarta sa publiko? Ing-ani na diay kasayon nga makuha ang kuwarta nga dili man na ila, kundili sa mga estudyante? Unsa na lang kaha ang ugma nato ana kung ang simpleng pagbantay sa atong kuwarta dili man mabuhat? Kung kani madali-dali lang nila, unsa pa kaha ang ilang kayang buhaton? Dili gayud ni maayo nga gimbuluhaton sa atong mga lideres diha sa CASS-EC.

Kung nasayod ang tanan, ang pagpanghulam o pagpangkuha sa kuwarta sa publiko kay usa ka krimen nga puwedeng ika-tangtang sa taong mubuhat niana. Bahalag unsa pa nga rason, sa ngalan nga gikuha ang kuwarta para sa personal na gamitonon, puwede nga ma-impeach ang usa ka lider. Makasabot man ang tanan siguro kung ga-50-50 na jud imong mama o kinsa man kahang miyembro sa pamilya pero dili gihapon na igo nga rason para gamiton ang kuwarta sa publiko. Dili man na imoha, nganong hulmon o kuhaon man nimo na? Pero, bag-o maka withdraw sa bank account kailangan og pirma sa EC Adviser kay usa mani siya sa mga assignatory. Nakabalo ba ni ilang adviser sa tuyo ug tumong sa Gobernador? Nindot unta kung makuha nato iyang panig.

Ingnon nato nga nauli man sa atong Gobernador ang kuwarta. Maayo kay nauli. Maayo. Pero, wala man na sa nauli o wala. Ang dakong kabalaka sa mga estudyante ang maong akto sa pag-panghulam, kung ang EC pa atong pa-istoryahon, ug kung walay mubadlong ani nila, naa’y dakong posibilidad nga mabuhat gihapon ang in-aning klaseha sa akto sa mga umaabot pang mga opsiyales nga mag-lingkod dinha sa EC. Kung mausab, naa ba’y kasiguradohan nga mauli ang kuwarta nga ilang gihulman, pareha sa gibuhat ni Dipatuan? Dili ta makaingon. Ug kung mahitabo ang atong gihadlokan tungod kita mismo wala gapakabana sa pagbantay, kita gihapon ang mahasol og mag-antos niini. Kung sa Iningles pang pinulungan: Prevention is better than cure.

Sa laing bahin, dakong intriga pud sa kadaghanan kung kinsa ning maong poser accounts. Daghang ga-ingon nga naa’y gapaluyo ani nila og kauban ra pud daw ni sila’g departamento sa CASS, nga kaning tawhana naa pu’y personal nga aligugot sa mga ga-lingkod karon sa EC mao nang makaya ra nya’g laglag ug dali-dali ang “baho” sa sulod. Kung unsa ma’y tinuod, kamo na’y muhukom.

Pero, taymsa, dili ba ta matingala kung aha sila gikan sa maong papeles nga ilang gipikturan ug gi-upload sa facebook? Di ba, dli man ta makadali-dali’g kuha ug ingani nga impormasyon samot nga kung mang-gilabot kini sa financial status? Duda sa kadaghanan nga naa’y gakunsabo nga dakong tawo para makakuha ni sila’g kopya sa statement of account sa EC. Mag-apil-apil na pud diay atong mga opsiyales sa iskwelahan sa mga ing-aning kabuktotan nga mabuhat sa mga estudyante? Dili ba sila ang mubadlong sa sayop? Na-unsa naman ni.

Tungod sa ing-aning ngilngig nga panghitabo, dapat na nga manghilabot ang mga estudyante sa ing-aning mga kalihukan, labi na kung unsaon pagdala sa atong mga EC officers ang atong kolehiyo. Kay kung dili, ato man pud ning kawad-on nganong gipasagdan ra nato ni sila na mubuhat sa mga butang nga ika-pahamak pa nato. Bahalag magkabuang namo dinha, pero ang husto ray amo.

Dumdoma, kung walay magpatamas-tamas, walay mang-abusar.